قدرةٌ خفية

قدرةٌ خفية

سرًا ... يطارده الأخرون

سرًا ... يطارده الأخرون

دقات قلبي

دقات قلبي

دنيا الخيال

دنيا الخيال

طرف رابع

طرف رابع

أنا طرف رابع ياهووو

بس شكلهم كده نسيوه

طرف رابع

ماشي ضايع

حاله يصعب

وطالع عين اللي جابوه

ماشي بتفرج

على ناس وبتهرج

في اللخبطة والهم رموه

دولا طرف أول

دولا الوحشين من الأول

سرقونا وأكلوا اللي خدوه

ودولا طرف تاني

قتلونا غدر يا عيني

والقاتل ... ولا عرفوه

بيقولوا ده التالت

القاتل أبو دم بارد

طب يللا هاتوه ..
وقصاد عيني اعدموه

طب عارفين الخامس مين ؟!

دول هما الناس الرايقيين

ده فن وده مغنى

ودولا نخبة وجعوا دماغنا

والله دي عالم فاضيين

ودماغي يا ناس وجعوه

مين حاسس بيا وداري ؟!

في الهم إزاي ناري ؟!

بتزيد .. ولا همي شالوه

والله أنا الرابع

موجود بينكم وسامع

اسمي أهو بتقولوه

أيوا أنا الغلبان

ومن غلبه بقى عنده جنان

نطق الحجر .. قال إلحقوه

بالذمة حد هيلحقني ؟!!

وللا اللي هييجي هيغرقني ؟!!

ويوم ما أصرخ ...

تقولوا بلطجي ..

موّتوه واحرقوه

ده أنا الرابع ياهووه

أيوا أنا الرابع

غلبان وكلي مواجع

بحلم بحقي ألاقيه راجع

شغال وطالع عيني

وبرضه حقي كلوه

أنا العامل  .. أنا الزارع

أنا النجار .. أنا الصانع

أنا اللي شايل هم بلادي

ولوحدي بكمل .. مشوار أجدادي مشوه

يا عالم مالهاش حل

أنا قلبي فاض بيه وكل

سايبكم تنادوا بحقي

أتاريكم أصلاً ...

الحق ولا تعرفوه

أنسوني ...

ما أنتوا من الأول ناسيين

صوتي وحقي وحياتي ...

كده كده مني رايحين

بس أنا الرابع يا هووووه

أنا اللي في الأقسام سحلتوه

وأنا اللي في الطوابير بهدلتوه

وأنا اللي في أكله وشربه وصحته أهملتوه

وأنا اللي كل مكان أروحه بتطنشوه

وأنا اللي على ورقة بقرشين علاوة بتعذبوه

وأنا اللي بشكلي المبهدل ولا بتعبروه

وأنا اللي في الأتوبيسات بتحشروه

وأنا اللي في ماتش كورة موّتوه

وأنا اللي لما قال حقي .. في عينه عميتوه

وأنا اللي في الميدان بالغاز خنقتوه

وأنا اللي لما مات .. في الزبالة رميتوه

وأنا اللي وقت الصناديق بس ... بتفتكروه

بالله عليكم ...

لسه ليكم عين اسمي تقولوه ؟!!

فوضت أمري فيكم لربي ..

ومسيركم يوم بكل اللي عملتوه فيا ...  هتقابلوه

***

أَتَمَنَّىْ أَنْ تُعْجِبَكُمْ كَلِمَاتِيْ

وَلَكُمُ دَوْما خَالِصٍ تَحِيَّاتِيْ

الْقِيْثَارَةْ

سُهَى يَحْيَىَ