أكيد بنحبها
بنحبها
أكيد بنحبها
بنحب هواها ..
أرضها وسماها
ونعيش ونموت سوا على أرضها
صدقني مش إنت لوحدك
كلنا دايبين في عشقها
اللي راح التحرير
وبأعلى صوت جاب حقها
بس كمان في زيه كتير
على كل شبر .. ثار شعبها
كلنا شايفنها فوق
ولا يوم حد فينا يضيّع حقها
واللي راح العباسية
برضه كمان بيحبها
شايف حلم تاني
وبإيده قادر ياخد يدها
ليه تلومه أو يلومك
ما أنت زيه كمان منها
فكر هتلاقي الحقيقة
إحنا واحد .. إحنا أهلها
عاوزينا متفرقين
عاوزين بخناقنا يوجعوا قلبها
مين قال إننا ناسيين
دم شهيد ضحى في حبها
في القلب طول العمر ساكن
ما هو ياما مات شهدا في حبها
أنا وأنت وهو وكلنا
ولا نقدر يوم نوجع قلبها
لا إحنا وطني ولا فلول ..
كله في بطاقته ...
مكتوب ابنها
بلاش نخوّن بعضنا
أحسن بإيدينا .. نضيّع حقها
بره أو جوا الميدان ..
ماتقولش إنت بس اللي فاهم
وشايل همها
حواليك كتير تعابين ..
بتبخ في الودان سِمها
وإحنا شعب هادي طيب
بيصدق الناس كلها
خلي بالك إنت وهو
لما نتخانق هننسى حلمها
وهما من ورا ضهرك بيجوا
وبسكاكينهم يطعنوا ضهرها
وأنت ملخوم لشوشتك
بتشوف مين اللي هيكسب حكمها
يا عم دول ناس مصالح
همهم ع الكرسي
مش على قلبها
وإحنا أكتر .. وحتى الشرطة والعسكر
بص في عروقنا ..
هتلاقي بيجري دمها
إيه يعني غلطوا حبة ..
بعدين نتحاسب ..
لما ييجي وقتها
دلوقتي إلحق شوف هتعمل إيه
الوقت ده كله حقيقي ...
محسوب من عمرها
واللي فاضل مش كتير
وبسرعة هنبني مجدها
سيبك من اللي مش عارف قيمتها
بكره بإيدك وإيدي ..
كالعادة هتسبق عصرها
مش إنت برضه زيي أنا
يهمك صورتها .. ومكانتها واسمها ؟!
أصل إحنا مهما اختلفنا في رأي
والله كلنا .. من كل قلوبنا
أكيد بنحبها
***
أَتَمَنَّىْ أَنْ تُعْجِبَكُمْ كَلِمَاتِيْ
وَلَكُمُ دَوْما خَالِصٍ تَحِيَّاتِيْ
الْقِيْثَارَةْ
سُهَى يَحْيَىَ
